• Motto

Oétgeleech

Opus Jocus Leedjesaovend 2018

Bestel noow ôg kaarte veur Opus Jocus Leedjesaovend 2018 op 29 september.

Klik heej veur miër info

Niejs

Mis 't neet! Jocus Leedjesaovend 2018

Op zaoterdaagaovend 29 september is Opus Jocus Leedjesaovend. Aan de veuraovend van 't jubeljaor is dit einen aovend waose beej wíls zien.
11 finaliste strieje um “de Funs” en ein plaats op de Jocus CD.

De bezeuker kint zich in ein aovendvöllend program begaaje mit optraejes van Joekskepel d’n Heiten Haspel, Bram en Ruud, Net oét Bed, Jocus Hofkepel en de Drekskaters. De prissentatie is in hand van Cielke Sijben.

Kaarte zien via ’t thoésblaad van Jocus verkriégbaar: www.jocus.nl/webshop/toegangskaarte. Veur minse die neet de gansen aovend kinne staon zien d’r beperk zitplaatse te kaup. Miër informasie euver ‘t bestelle laes geej heej.

De 11 finaliste in volgorde van eur optraeje op Jocus Leedjesaovend zien:

  1. Geliék vertrokke, gebrach door Hay Geritz / Mark Janssen / Petro Janssen / Vic Suiker
  2. Deze is van mich, gezônge door Alex van den Beucken / Alwin Grijseels / Paul Peeters
  3. As ik dit druim, gebrach door Marissa Verhaegh / Ron Deenen
  4. As ik de baas waas, gezônge door Jules Fransman / Gijs Engels
  5. De meus ens weite, gebrach door Bart Jacobs / Luuk Janssen
  6. D’n ierste fioelis, gezônge door Ken Vaessen / Max Timp
  7. Geis dich mich belle, gebrach door Karen van Hoften / Ken Vaessen
  8. Dans, gezônge door Annemarieke Leurs / Kristel Roulaux / Roel Daniëls-Peeters
  9. Ik kin neet bäöke, gebrach door Fred Honig / Marcel Tabbers
  10. In de sambaban, gezônge door Hans Wijhers / Joep Bindels / Niels van den Brand
  11. Ik hald ‘t kort, gebrach door Hay Vercoulen

Naeve de Vakjury en ein jury bestaonde oét de Vorste van de wiek-vastelaovesvereniginge/Vastelaoveskefees en Joekskepelle, kinne zoëwaal de minse in de zaal as de tillevisie-kiéker eur stum oétbringe.
Opus Jocus Leedjesaovend 2018 kump tot stand in samewerking mit LagoProjects, Theater De Maaspoort en Omroep Venlo.

Vastelaovesleedje gekômponeerd door Kunsmaotige Intelligentie duit veur ’t iërs mei aan Veurselectie Jocus

Anderhalf jaor geleeje tiédes Vastelaovend woort ’t ideej gebaore um te kiéke of ’t meugelik zoel zien um ein “Artificial Intelligence” (A.I.) systeem te make det de ideale vastelaovesplaat zoel kinne make. Al vlot bleek det ’t make van ein uniek en compleet meziékstök door A.I. technologie erg complex waas en waereldwiéd nog noeits vertuuënd waas. Aevel det heel de initiatiefnemers neet taege. De ICT-opleiding van Fontys Venlo in samewerking mit de A.I. startup Genzai oét Venlo hebbe d’n haas opgepak en beslaote ein miër jäörige samewerking op te zette, waobeej ‘t A.I. model idder jaor wiejer oétgebreid en geperfectioneerd wuurt.

Van fibberwari wies juni 2018 is ein Duitse Fontys ICT-student (Tim Wedde) hierop bij Genzai aafgestudeerd en veur zien aafstudeeropdrach ein 10 (gen 11) ôntvange, ein unicum binne Fontys. Ind juni waas ‘t iërste leedje gemak en woort beslaote um dit leedje, in samewerking mit Frans Pollux, in te steure veur de Jocus Veurselectie, de veurronde van Opus Jocus Leedjesaovend. Tiédes deze jäörlikse leedjeswedstriéd, georganiseerd door Venloosch Vastelaoves Gezelschap Jocus, waere de veer nieje vastelaovesleedjes van Venlo gekaoze. ‘t Leedje “Schöddele” is gekômponeerd door ‘t A.I. model waobeej Frans Pollux d’n teks haet geschreve. Fontys Lector Roy Lenders (auk eigenaer van Genzai) en ex-Fontys student Tom Cornet hebbe ‘t leedje vervolges gezônge. Helaas is ‘t liedje neet doorgedronge tot de 11 finaliste van Opus Jocus Leedjesaovend. Aevel det waas auk neet persé ‘t doel. Beweze is det ’t meugelik is um mit behölp van A.I. technologie ein uniek en apart meziékstök te kômponere waobeej nemand doorhad det ’t meziékstök door eine kompjoeter waas gekômponeerd.

‘t Gebouwde model is getraind in de Google Cloud op ongeviër 1000 MIDI-bestanden (digitale noëtemeziék) van bekinde Limburgse vastelaovesplate, Nederlandstalige leedjes en Duitse schlagers. De kunsmaotige intelligentie haet heejoét de specifieke stiél van vastelaovesmeziék “geliërd”. ‘t Model besteit op dit moment oét ein complex gehiél van miërdere verschillende A.I. modelle waobeej idder A.I. model éín verschillende kômponent haet geliërd, in dit geval de melodie, drum, bas en de akkoorde. Vervolgens is d’r functionaliteit toegevoog die d’rveur zörg det de 4 verschillende A.I. komponente good samenwerke en is d’r functionaliteit toegevoog die zörg veur de totale opbouw van ‘t meziékstök (begin, refrein, koeplet, brök, ind et cetera).

’t Is ein miërjäörig projek waobeej ‘t de bedoeling is det ’t gemakde A.I. model vaerer oétgebreid en geperfectioneerd wuurt. Heejveur zeuke Fontys ICT en Genzai noow al weer nieje afstudeerders veur de volgende oétbreidinge. Taeves zal ein door ‘t A.I. model gekômponeerd leedje (undercover) gaon deilneme aan ‘t Limburgs Vastelaovesleedjes Konkoer (LVK). Kin ‘t Limburgse publiek raoje welk LVK leedje door A.I. is gekômponeerd?

Taeves groëten dank aan alle betrokke partieje. Alleriërs Fontys afstudeerder Tim Wedde dae ’t ziër complexe model heeft gemak. Aevel neteurlik auk de Fontys ICT opleiding, Genzai, Frans Pollux, 8vance Matching Technologies en alle euverige betrokkene die dit initiatief wies noow toe ôndersteund hebbe.

‘t Leedje det is ingezônde veur de Veurselectie van Jocus is heej te beluustere:
https://www.youtube.com/watch?v=Kuis_GA-M5o 


 

Volgende evenemente

Kaarte bestelle