We schrieve 1842 as de Venlose historicus L.J.E. Keuler de geschiedenis van Venlo beschrief wies det moment. “De kwijnende staat, waarin de stad (Venlo) zich bevindt, is duidelik zigtbaar. Hare schoonste dagen zijn voorbij, en hare toestand zal meer en meer verergeren, want in de toekomst zelve valt het moeilijk eenige verbetering te verbeiden”.
 
Dit sômbere geschrif en 't feit det Venlo ein jaor later, in 1843, zien 500 jaor Stadsrechte zoel gaon veire, waas veur ein aantal veuraanstaonde Venlonaere raeje genôg um, in naovolging van de stad Kölle, in Venlo de zoëgeneumde Rheinische Vastelaovend te gaon organisere. De verbôndeheid mit Kölle waas erg groët en zeej kôste eigelik neet achter blieve. Alzoë woord op 6 oktoëber 1842 de Societeit Jocus opgerich.
 
De oprichters en kertrekkers van ’t iërste oor haopde mit dees oprichting det de georganiseerde Vastelaovend ein vaste plaats kreeg beej alle Venlonaere. Um ’t allemaol finansjeel te kinne behapstökke woord zörgvöldig ein aantal notabele minse oet de stad bereid gevônde, zörg te drage veur de nuëdige pecunnia.Logo Societeit Jocus 1842

Ruum 170 jaor later is de Sociëteit Jocus Venlo van toen het Venloosch Vastelaoves Gezelschap Jocus van noow. Jocus veult zich, as aldste vastelaovesvereiniging van Nederland, 't aan ziene stand verplich um te vastelaovend in Venlo te blieve verzörge en vernieje. De leeje van Sociëteit Jocus 1842, oftewaal inkele gerenomeerde Venlose bedriéve traeje anno 2014 in de vootspaore van eur veurgangers en drage mei zörg veur 't finansjeel meugelik halde van de unieke Venlose vastelaovend.

De Sociëteit Jocus 1842 is opgerich um zien leeje, maximaal 15 in getal, zich same in ein exklusieve setting te laote ontmoete. Daobeej kin gedach waere aan beejvoorbeeld ein exklusief Sociëteits Diner veuraafgaond aan 't Hofbal of beejeinkômste in 'n spesjale umgaeving. Tiedes dees beejeinkômste wuurt ruumte gecreëerd veur 'n good gesprek maar zeker auk um mit mekaar te bespraeke welke rol de Vastelaovend in de hedendaagse maatscheppie vervölt en waat de rol van Jocus heej in is. 

Daonaeve steune de Sociëteitsleeje Jocus in finansjele zin opdet Jocus de Venlose Vastelaovend wies in lingte van jaore kin borge en "'t Theater van Klatergold en Parelwien" blievend kin laote schittere in Venlo.