Adjudant Paul Hekkens is 61 jaor ald en same mit ziene laevespartner Jacqueline halde zeej PTAH Kunshandel.
As student woel hae ’t leefste nao de hoëgeschoel veur de journalistiek, aevel woort dao oétgeloët. Hae volgde de liërare-opleiding um aan de slaag te gaon in ’t ônderwiés. Maar de deensplich trok dao eine streep door. Nao zienen deenstiéd ging hae asnog in ‘t ônderwiés aan de slaag op ein internationale ZMLK-schoël wao les gegaeve woort aan kinder die in ein haos kans- en oétzichsloze situasie terech ware gekômme. Zien avontuurlikke en bedriéfsmaotige aard trokke um echter nao ‘t bedriéfslaeve.
Zoë volgde ein leidinggaevende funksie beej Océ. Nao ein laupbaan beej oétzendorganisatie’s ASW en START, begôs hae as zelfstandige Flex Partners, ein bureau in seleksie en werving. Kuns bleef um intigrere en zoë kwaam eine niejen druim oét wie hae ziene eige kunshandel begôs: Ptah Kunsthandel. Daoveur wuurt euver de ganse waereld gereis. Ein perfekte kombinasie tösse kuns, avontuur en ôndernemerschap. Maar nao iddere reis is hae bliej as de bördjes ‘Venlo’ weer in beeld kômme: “Ik bin emand dae gaer de kanse griép die zich veurdoon. Net wie miene vrind en noow Hoëgheid Erik bin ik auk emand dae euveral vol veur wil gaon en allein mit ‘t beste content is.” Paul is auk eine fervent hardlauper en makde jaorelangk deil oét van ’t Venloopbestuur. Daonaeve is hae auk aktief gewaes in ‘t bestuur van cultureel jaorbook De Buun en waas ein van de grondleggers van ‘t nieje Raodhoés in Bliërick.