Adjudant Wim Ramakers is 64 jaor en getrouwd mit Gert. Zeej hebbe twië kinder en gruuëtse opa en oma van viéf kleinkinder.
In ’t dageliks laeve is Adjudant Wim meide directeur/eigenaer van Keurslechter De Karbinder.
Zien vader had eine slechterie in Simpelveld. Wie Wim 5 jaor ald waas is ‘t gezin naor Venlo verhoés wao ein slechterie begôs woort op de Bolwaterstraot. Zoë haet auk hae as aldste zoon oét ein gezin mit 8 kinder, zien jeugjaore in de binnestad belaef. As vanzelfspraekend kwaam hae dus auk dök in ‘t Ald Weishoés waor hae toen ziene vrind en noow Hoegheid Herm liërde kinne. As d’n daag van gister herinnert hae zich nog det hae Herm zoog zitte op eine hoëge stool. “Hae zoot daor mit ein colafleske in de hand. En deej ein monoloog van ein half oor. Idderein loog in eine deuk. Humor van de baoveste plank. Kleinkuns in ‘t groët” zaet Wim.
‘t Vak van slechter is auk zien hobby. Wim zaet heejeuver: “Ik bin zoë begaon mit mien vak en bedriëf dèt ze mich dökker aaf môtte remme. In 1988 heb ik same mit Gert de zaak van mien elders euvergenaome. Mien broor Frans had slechterie de Karbinder. Dees hebbe weej oétintelik euvergenaome en same mit mien dochter Hanneke en schoënzoon Marco zitte weej noow in de zaak. ‘t Is mein lös en mien laeve, maar steeds miër wil ik de tiéd vreejmake veur de andere leuke dinger in ’t laeve. Beejveurbeeld, ‘t make van lange wandelinge en de Venlaup same mit Hoëgheid Herm en Adjudant Roel huurt dao ônlosmakkelik beej. En zeker auk beej de kaartklup EVA en Oma’s ronde taofel vindt hae regelmaotig zien ontspanning. Vaerder kint hae zien energie en kaokkunste kwiét beej de Cuisine Culinair.
Veur Wim beteikent de vastelaovend good loskômme van de dagelikse beslômmeringe. “Lekker ôngedwônge mit idderein alde feepe en veural geneete. Mit Vastelaovend kint idderein groëte dinger klein make en relativere mit ein good aug veur de minse die dit neet (miër) as vanzelfsprekend kinne…Iets waat in ‘t dageliks laeve eigelik auk vuuël dökker zoel môtte kinne.”
Same mit zien vrinde ’t Jocus Dreejspan 2018 te meuge vorme is eine druim dae oétkump. En veural de Joeks en gezelligheid daobeej oétstraole die de Venlose vastelaovend zoë uniek mak.