Adjudant Roel Wienen is 56 jaor en getrouwd mit Jet. Same hebbe zeej dreej kinder: twië döchter en eine zoon.
In ’t dageliks laeve is Roel Partner van RSM, belastingadviseur.
Nao zien liëgere schoëltiëd ging hae rechte studere in Tilburg mit de specialisasie fiscaal recht. Daonaeve waas hae erg sportief ingesteld. Groët gewaore mit voetballe beej Venlosche Boys. Neet allein trapde hae dao taege de bal. Hae waas auk veurzitter van de jeugaafdeiling van dees vereiniging. Heejeuver zaet Roel: “ Ik had mein hèrt ligge beej alles waat mit de jeug te make haet. Maar beej ‘t voetballe misde ik eine bepaolde groep sporters. Namelik minse mit ein (geistelikke) beperking. Juus umdet ‘t veur eur zoë belangriék is um actief mit sport bezig te kinne zien heb ik meide ‘t initiatief genaome um te starte mit ’t G-voetbal. Iets waat toen veur Limburg nog uniek waas. Ik heb daor hiël vuuël moeie maar auk dreuvige momente meijgemak.” Dus net zoë as dit veur de Hoëgheid geldt, bliék heejoét zien groëte sociale betrokkeheid mit minse die ‘t meuilikker hebbe in de samelaeving.
Zien bestuursfunsie beej de Venlosche Boys kreeg ein vervolg beej VVV. Al 14 jaor vervölt hae de funksie van penningmeister. Iets wao nao dit sezoen ein ind aan kump.
Auk veur um besteit eine nauwe band mit ‘t Ald Weishoés wao zien kinder gaer kwame mit name beej de activiteite van Jocus Toekôms. Maar auk Jocus steit beej um hoëg in ‘t vaan. 11 jaor waas hae bestuurslid van de Vrinde van Jocus waovan 5 jaor as veurzitter.
Vastelaovend viert hae zoëas de meiste Venlonaere. Neet op de veurgrond maar mit en tösse de vastelaovesgekke. Zien moëiste vastelaovend moment is dan auk det hae in dae vastelaovestoemel zien vrouw Jet haet liëre kinne. Hae zaet: “Vastelaovend huurt veur idderein te zien. Neteurlik môt dae deils geregeld en georganiseerd waere. Maar veural ‘t spontane môt op de veurgrond staon. Dit fees vierse dan auk mit idderein. Mit dien gezin, vrinde en idderein daese spontaam taegekumps” aldus adjudant Roel.
In de aafgelaupe maonde hebbe zeej tiédes eur gezamelikke wandeltochte, ein van de groëte hobbys van dit Dreejspan, dan auk al erg vuuël gespraoke euver alles waat eur te wachte steit. ‘t Kin neet vlot genog beginne.