Prins Herm I (Pollux) is 61 jaor en getrouwd mit Marij. Zeej zien same gruuëtse elders van veer kinder en nog gruuëtsere opa en oma van twië kleinkinder.
In ’t dageliks laeve is d’n Hoëgheid eigenaer van Pollux&Pollux, Intermediair in reclame.
D’n Hoëgheid is gebaore en getaoge in de binnestad. Ziene pap Piet, eine bekinde buutereedner en zenger, waas greunteboer in hertje stad wies hae ein kefee begôs in de huidige Splinter. Daonao woort det ‘t bekinde kefee Pollux op de Parade.
As kleine hens kwaam hae net wie alle andere kinder oét de binnestad al in ‘t Ald Weishoés. Dao euver zaet d’n Hoëgheid: “Veur mich veulde ‘t Ald Weishoés as ein werm nes, as ein werme hoéskamer. Via miene ome Jan kwaam ik dao in aanraking mit ‘t buute beej Jocus Toekôms. Dit woort gevolg door de jeug-Raod van Elf, Sirremomiemeister en Vors binne Jocus Toekôms. Beej ‘t ‘groëte’ Jocus heb ik miër as 25 jaor in de Joekskemmissie gezaete en bin ik 16 jaor as Sirremomiemeister veurop gegaon in de Venlose Vastelaovend.” Auk is hae van meining dèt asse Vastelaovend ech wils liëre kinne en dit tot in lingte van jaore vol wils kinne belaeve d’r op jonge laeftiéd al mei begôs môt waere.
Vastelaovend en mit name ‘t optraeje zoot d’n Hoëgheid in ‘t blood. Zoë makde hae same mit zien broor Bert en mit Joep Huijbrechts deil oét van ‘t Broëzerkwartet. Dit woort gevolg door same mit Bert te gaon zinge.
Auk ‘t prissentere en aktere pas Prins Herm wie ein maotpak. Want wae kint d’n Hoëgheid neet van de Blauwe neus op vastelaoveszaoterdaag en as vize veurzitter van v.v.v.v.v.v.v.v.v.v.v. De Waus? Auk in diverse Venlose Revue’s waas hae te bewôndere. Veur al dees activiteite is hae ônderscheide as Commandeur in de Orde van de Zwalm beej Jocus en Doctor Humoris Causa van de Narren Universiteit Limburg.
Naeve zien vastelaoves- en culturele activiteite is de Hoëgheid auk eine ziër sociaal bewaoge mins. Heej euver zaet hae: “um dich haer kinse mekkelik zeen wae ‘t good geit. Lastiger te zeen zien de minse die ‘t minder mekkelik hebbe in economisch-, sociaal- en psychisch opzich. Juus iets extra te kinne doon veur dees minse guuëf ein werm geveul.” Meide door zien inzet heejveur en veur de Venlose (vastelaoves) cultuur is hae auk keuninklik onderscheide as Lid in de Orde van Oranje Nassau.
Ondanks det hae de Vastelaovend in al zien facette haet doorlaef, bleef d’r veur um nog maar ein groëte wins euver. Prins waere van de stad waovan hae zoëvuuël helt. D’n Hoëgheid zaet heejeuver: “Al jaore haopse as echte Vastelaovesgek det de wiechtigste vastelaovesvraog oeits aan dich gesteld geit waere. Det mak de verrassing en de belaeving nog intenser op ‘t moment det de Vors dich de belangriéke vraog ech stelt. Vanaaf ‘t iërste moment heb ik mich dan auk gespits op ‘t bezeuke van alle wiëkvereiniginge, kinderfeeste, minderbedeilde in de samelaeving en spontaan idderein te meuge ontmoete op de straot, in ein kefeeke en in de optochte. Weej zulle de Joeks wie ein confettiraege oét gaon struie euver ‘t ganse Jocusriék.”