Adjudant René Dings (rechs) is 48 jaor en getrouwd mit Jeanine Dückers. Zeej zien gruuëtse elders van zoon Dio (16) en dochter Danee (13). René kump oét ein ech gerdeneersgezen wao de Vastelaovend ens per jaor de insigste oétlaotklep waas. As klein menke woort hae al op de bar gezatte beej de Knevel in de Joëdestraot en haet zoë de Vastelaovend liëre kinne. Zien studies haet hae, wie kin ‘t ouk anders, in de agrarische richting gedaon. Nao ein studie van 5 jaor in Den Bosch haet hae succesvol de HAS aafgeslaote. Zien werk ging aevel ein andere richting op, namelik de finansjeele waereld. Maar de relasie mit de thoésbasis en zien opleiding bleef, umdet de Boereleenbank in de Rabo woort opgenaome. Door is hae noow werkzaam as Account Manager Bedriéve.
Ein van zien groëtste passies is de Venlosche Boys. Hae haet daor diverse funkties vervöld, zoëwaal op ’t veld as daoboéte. Oét de Venlosche Boys en de buurtvereiniging is de optoch- en vrindeklup Handvaeger en Bleek ôntstaon. Zeej haolde van 1992 wies 1996 viéf jaor op riej d’n iërste in de Groëten Optoch van Jocus. Eur kluplokaal waas In de Vildersgats.
In 1993 woort René lid van ‘t Jocus kommisariaat Riej en Traksie. Zeve jaor late traoje hae toe tot de Raod van Elf as Graaf Kratspoët (twiëde penningmeister) en van 2005 wies 2012 as Jônkhiër Plökvogel (iërste penningmeister). Veur dees verdeenste woort hae ônderscheide as Commandeur in de Orde van de Zwalm. Sinds 2015 is hae veurzitter van ’t Volkstheater Frans Boermans. Alzoë zit ’t beej René mit de Venlose költuur en de Vastelaovend miër as good.