Miene naam is Jacques-Paul Joëste, gebaore op 3-6-67 op de Vleisstraot 75, baove de slegterie van mien vader en mooder. Ik heb vruuger op de Martinusschoël in de binnestad gezaete en nao waat umzwervinge via o.a. 't Marianum terechgekômme in Tilburg wao ik Nederlands en Ingelse taal heb gestudeerd.
Ik bin noow werkzaam as docent Nederlands op College Den Hulster in Venlo. Ein erg leuke en gezellige schoël. Naeve mien professionele werkzaamheden als lieraar, heb ik mien eige teksbedriéf, wao ik mich volledig bezig hald met 't schriéve van commerciële tekste veur 't bedriéfslaeve (www.detekstschrijver.net).
Ik bin 38 jaor lid van de Venlose Hockey Club, bin actief in commissies en speul regelmaotig mei beej Veteranen B. Ik bin same met adjudant Geert actief beej de E-tjes (jongens). Ik bin ôntzettend gruuets op Vhc. Ech ein prachtige club. Det meug idderein weitel! Ik heb jaore same gehockeyd mit adjudant Ikar en ouk ein paar jaor mit adjudant Geert
Ik heb vuuel hobby's waovan kaoke beej LGB d'r ein is. Mien adjudante zien ouk allebei lid van dit schoën stel hiëre. Vaerder kinne de meise minse mich van de meziek. Ik zit dit jaor 20 jaor in de meziek. Waat begos met Veur altied eine Venlonaer in 1994 is via Blaauw (Hertje Venlo, Waanzinnig Verleef, Zeven zeeën) en vastelaovendmeziek met nummers as Sint Juttemis, de Vastelaovestrein, Vrinde, Kom gangk mei, De ganse poet en Euverkant van de nach twië jaor geleeje oétgekômme beej Stef Bos, waomei ik noow regelmaotig op de buun staon. De cd Verstild in stein haet 't erg good gedaon en op 31 mei 2014 steit de volgende cd-prissentatie op de agenda. Mien Bos-combo haet ein schitterende cd gemak en besteit oét Jeroen van den Berg, Alexander op't Veld en Bart Gubbels.
Last but not least. Mien gezin. Ik heb eine beauty van ein vrouw genaamp Nicole Douben (werkzaam beej Allers) en weej hebbe twie sieskes die luustere nao de name Wessel (10) en Just (7). Ze zitte allebei op de Talentecampus en we woëne inmiddels op de Börgemeister Houbestraot. Oeits wil ik weer truuk de binnestad in. Nao Hertje Venlo, net wie vruuger! Mien boys zien ouk allebei lid van de Venlose Hockey Club en det veult hiël erg good...