Auteur: Jaap Stroeken, archief V.V.G.Jocus

De iérste berichte euver Vastelaovend vieringe in de stad Venlo datere oét 1349. In Letiénse stadsraekeninge wuurt gespraoke van ein "Carnis privium", 't aanbraeke van de vaste-tiéd. In 1465 wuurt in alde stadsbeschriévinge geschreve van ein Vastenavond viering van "spoelluden ende gesellen, die opten taeffelen spoelden ende mytten swerden… dansden".

In de iëuwe die volge zien d'r op wisselende momente meldinge van feeste van de viering van ein carnaval of 'vastelavont'. Ein viering waat lang neet altiéd van zelfspraekend is gewaes. In verschillende tiédsperiodes woorte de vieringe door de Kerk of de Magistrate ('t stadsbestuur) verbaoje. De Magistrate verbaoje de vieringe in de stad in 't jaor 1755 um de verspreiding van ein besmettelikke ziekte te veurkomme. In andere jaor volgde weer ein bleuj-periode wao 't fees weer vuël minse beejein brach.

Alzoë wuurt de Vastelaovend in Venlo al sinds iëuwe gevierd. Wao 't in vuël plaatse in de waereld ein maneer van laeve is, is de Vastelaovend in Venlo in idder geval eine belangriéke hookstein in de Venlose Gemeinschap.

De Vastelaovend beteikent vuuël miér. 't Is d'n tiéd van 't jaor wao-in de waereld op ziene kop gezatte wuurt. De Vastelaovendgekke neme de stad in bezit, waobeej alle sociale range verbrand waere en laeftiéd, kom-aaf, aanzeen en waat al neet miér in d'n hook gezatte waere. Venlo verandert in 't Jocusriék wao Prins Carnaval de scépter zweijt. Alzoë d'n tiéd wao-in de Vastelaovendvierder zichzelf en d'n boétestaonder ein speechel veurhelt en 't dageliks laeve haos gans tot stilstand wuurt gebrach. Baove-al is 't ein waor volksfees det men veural môt ondergaon um det Vastelaovend geveul, det zoëvuël Venlonaere dan in ziene greep helt, te kinne beschriéve. "As de Joeks ôs Jocusriék regeert."

Zier waarschiénlik is 't waord Vastelaovend ein verbastering van 't Hollandse vastenavond. Euver de perciese herkôms laupe de meininge oétein. De Vastelaovend is 't fees det veuraafgaond aan de vastentiéd plaats vind. De vastenaovend is d'n dinsdaag-aovend veuraafgaond aan as-woensdaag. Op as-woensdaag begint de vastentiéd, de viertig dagen-tiéd van vaste en bezinning veuraafgaond aan Paose. Vas steit, det dit volksfees euver de ganse waereld op verschillende continente wuurt gevierd. De vieringe in Venlo en Limburg zien gebaseerd op 't Rienlandse Fasnach.

't Venloosch Vastelaovend Gezelschap Jocus verwiés gaer nao andere brônne die miér informasie kinne gaeve euver 't ôntstaon, de beteikenis en de geschiedenis van de Vastelaovend.

Miér informasie onder andere via 't internet:

Film-baelde euver vruugere Vastelaovend vieringe in Venlo zien te zeen via onder andere:

In de baetere bookwinkels zien diverse publicaties verkriégbaar die informasie baeje euver d'n achtergrond van de Vastelaovend. 't Jocus Archief helt zich aanbevaole veur miér brônne en publicaties euver de Vastelaovend.

Verantwoording:
't Jocus-archief haet zien uùterste bes gedaon um zien historie zörgvöldig te beschriève. Heejbeej haet zeej ein beroep gedaon om bestaonde JOCUS publicaties, diverse brônne en nieje vôndste oët zien eige archief. Veur vraoge, opmerkinge of mier informasie kint geej kôntak opneme mit 't Jocus-archief via email: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.. Alle rechte veurbehalde, kopie- en auteursrech V.V.G. JOCUS 2010-©

Volgende evenemente

Kaarte bestelle