Elf van Elf / Inscheete

’t Waas eine lange naozomer, maar intelik weijt de herfswind zutjes aan auk weer waat Vastelaovend naor Venlo. Gelökkig persiés op tiéd, zoedet 11 november weer ’t startsein gegaeve kin waere veur ein niej seizoen vol joeks en jen.

Zoewie ’t zich huurt, start d’n daag mit elf kanonscheut vanaaf de mert veur ôs stadhoés. Daonao wuurt d’r ein vol program geprissenteerd mit hiel vuul meziék, wao-onder ôs eige Jocus Hofkepel, W-Dreej, DJ Falco, Oét de Maot en d’n Golden Hiering.

Niej: statiegeld baekers en gratis toilette

’t Inscheete van ’t nieje vastelaovesseizoen geit same mit de introductie van eine statiegeld baeker, auk zal dit jaor de Mert mit hekke waere aafgezatte.

Veuroétlaupend op de nieje regelgaeving veur plastic wegwerpbaekers die per 1 jannewari 2024 van krach is, kees Venloosch Vastelaoves Gezelschap Jocus en de Stichting Horeca Altstad Venlo as organisasie dit jaor al veur eine milieuvrintelikken aanpak. Det beteikent det Elf van Elf wuurt gevierd mit eine hard plestiek baeker waoveur statiegeld wuurt gevraog. 

Bezeukers kinne d’n baeker aan de bar kriége veur ein halve munt (ter waerd van € 1,75). Geis-se nao hoés, dan kin de baeker waere ingeleverd en kriégse € 1,00 truuk. Van de ingehalde € 0,75 cent waere alle benuuëdigde faciliteite bekôstig. Dit beteikent auk det de toilette de gansen daag gratis toegankelik zien.

Um de veiligheid van de bezeukers te waarborge hebbe Venloosch Vastelaoves Gezelschap Jocus en de Stichting Horeca Altstad Venlo op advies van de pliesie en de Gemeinte Venlo beslaote um de Mert mit hekke aaf te zette. Dit in verband mit de verwachte drökte tiédes Elf van Elf en um auk raekening te halde mit ’t winkelend publiek.

Bezeukers kinne de Mert bereike via de ingangk op d’n hook Gashoésstraot/Vleisstraot. Wanniër ‘t te drök wuurt op ‘t plein zal de toegang tot de Mert in overleg tösse gemeinte, pliesie en organisasie geslaote waere. 

Ein niej CD, eine niejen Opstaeker en ein niej Boérebroelofsgezelschap

“D’n elfde van d’n elfde” is naeve eine feestelikken daag vol joeks en meziek auk ’t moment det de nieje CD veur ’t iers verkriegbaar is, met dao op netuurlijk de 4 nieje winnende leedjes van Opus Jocus Leedjesaovend. Dees leedjes zien dan taeves auk beschikbaar via de straemingsdeenste. De 1^ste CD wuurt aangebaoje aan ozze Beschermhiër, d’n hier Antoin Scholten.

Naeve de cd is auk de niejen Opstaeker vanaaf zaoterdaag 11-11 te kaup. De opbringste heejvan kômme terech beej de diverse vastelaovesvereinginge in de gemeinte Venlo. D’n Opstaeker is dit jaor ein ôntwerp van Venlonaer Ivo Nellissen.

Vanoét de mert wuurt neet allein meziék gebrach. D’r zal namelijk auk ruum aandach zien veur t nieje gezelschap van de Boerebroélof, waovan de organisatie dit jaor in hand is van de Molukse gemeinschap binne Venlo onder de neumer “De kwante Kaketoe”.

’t Offisjele program deurt wies 21.00 oor. Traditiegetrouw vind de iërste zaoterdaag nao 11-11 de Groëte Prônkzitting plaats, dit jaor dus op 18 november.